Мәҙәк тоҡсайы

Һалым инспекторы бер ирҙән: – Һеҙҙең эш хаҡығыҙ шул тиклем бәләкәй, шундай йорт төҙөргә ҡайҙан аҡса алдығыҙ?– тип һорай. – Бер ваҡыт йылғала балыҡ ҡармаҡлап ултырғанда, алтын балыҡ эләктерҙем. Шул балыҡтан ҙур йорт биреүен һораным, – ти ир. – Юҡты һөйләмә, – тип асыулана инспектор,– мин һеҙҙең шул әкиәтегеҙгә ышана тип уйлай¬һығыҙмы әллә? – Ышанмайһығыҙмы? Әйҙәгеҙ, киттек. Йортомдо күрһәтәм, – тигән ир.

Баҡсала. – Һин ни эшләп ҡарасҡыға яҡшы кейем кейҙерҙең? – Ҡарғаларҙы ла хөрмәт итергә кәрәк.

Ир менән ҡатын һөйләшә. – Күршенең тауыҡтары баҡсабыҙға кермәй башланы әле. – Мин бит төндә егерме йомортҡаны түтәлдәргә һалып сыҡтым да, иртән, күршенең күҙ алдында, уларҙы йыйып алдым.

– Депозит нәмә ул? – Тимәк, һинең аҡсаң бар, тик һинең өсөн ул юҡ. – Улайһа, кредит нәмә була? – Кеҫәң таҡыр булһа ла байҙар кеүек йәшәйһең.

Ике әхирәт һөйләшә. – Беләһеңме, кисә беҙ ирем менән киске ашты шәм яҡтыһында ашаныҡ… – Ысынмы?! Шунан?! – Шунан ни, утты йүнәттек инде.

Хәрби комиссияла ҡолаҡ табибы: – Туҡһан биш… Һалдатҡа саҡырылыусы аңламай: – Ниңә шулай ҡиммәт?

Ҡатыны – иренә: – Беҙгә был этте олаҡтырырға кәрәк. – Ниңә? – Мин йырлағанда олой. – Һин беренсе булып башлайһың бит.

– Өҫтәл янында уҡыма! – ти ҡатыны, ирен шелтәләп. – Нимә ашағаныңды ла күрмәйһең бит! – Шуны күрмәҫ өсөн уҡыйым да

– Кейәүгә сыҡҡанһың икән, тип ишеттем. Иреңдән уңдыңмы? – Юҡ. Ирем ни бешеренә белмәй, ни иҙән йыумай.

Ике ҡарға һөйләшеп, реактив самолеттың нисек осҡанын тикшереп ултыралар. – Нисек шулай шәп осалыр инде… – Ҡойроғоңа ут төртһәләр, һин дә шулай осор инең…