Пост канала
Святых му́ченик, Трофи́ма, и Сава́тия, и Дориме́нта. И преставле́ние благове́рнаго кня́зя Фео́дора Смоле́нскаго, и Яросла́вльскаго чюдотво́рца. И ча́д его́, Давы́да и Константи́на. Тропа́рь, свято́му, Фео́дору, глас 4. Я́ко цели́тель преизря́ден, и наказа́тель благоприя́тен, мирски́и мяте́ж оста́вил еси́, и крест свой нара́мо взем, боже́ственым житие́м по́жив, и воздержа́нием плоти дю́шу украси́л еси́. И к моще́м твои́м притека́ющым, сосуд благода́ти показа́ся всеблаже́нне Фео́доре. Те́м мо́лим тя воспева́юще твою́ па́мять, во псалме́х и в пе́снех преподо́бне, моли́ся о душа́х на́ших. Сла́ва, святы́м тропа́рь, о́бщии. Глас, то́йже. Я́ко зве́зды многосве́тлыя от ю́ности восия́вше, освети́ла есте́ сердца́ ве́рных, принесе́нием честны́х моще́й ва́ших, доброде́тельми бо чюдес во́плоти, я́ко а́нгели наземли́ показа́стеся. Поще́нием насажде́ни бы́сте, я́ко древа́ при вода́х воздержа́ния, и напое́ни струя́ми слез ва́ших, и скве́рну омы́сте. Сего́ ра́ди яви́стеся прия́телище Бо́жия Ду́ха, кня́же Фео́доре, Давы́де и Константи́не. моли́те Христа́ Бо́га, спасти́ся душя́м на́шим. Тропа́рь му́чеником, глас 8. В Тро́ице хвали́мы Бог, Тро́ицу му́ченик просла́ви, Трофи́ма и Сава́тия и Дориме́нта. В Того́ ве́ровавше, врага́ низложи́ша. Тех моли́твами, Христе́ Бо́же, поми́луй нас. Конда́к преподо́бному, глас 4, по́добен: Яви́лся еси́ днесь. Яви́ся ве́лие солнце, Христо́ве Це́ркви, просвеща́я уче́ния светлостьми́ всече́стне. Я́ко черпа́лом златы́м от кла́дязя не иско́паннаго чюде́с поче́рпл еси́, от исто́чника неистощи́маго. Науспе́нии свое́м испи́л еси́ всеблаже́нне Фео́доре. И ны́не о все́х нас Христа́ моли́ дарова́ти гре́хов проще́ние. Сла́ва преподо́бным и похвала́. Ин, конда́к святы́м. Глас 8. Яви́стеся свети́льницы всесве́тлии, во́пло́ти я́ко а́нгели. И я́ко живота́ дре́во ра́йскоя, поще́нием и бде́нием и ве́рою возраща́еми процвели́ есте́. Моли́твами свои́ми, небе́сныя благода́ти прие́мше. Вра́чеве же кре́пцы я́вльшеся, исцеля́ете неду́жных ду́шя, с ве́рою прибега́ющих к ра́це моще́й ва́ших, чюдотво́рцы сла́внии, Фео́доре и Давы́де, и Константи́не. Моли́те Христа́ Бо́га, гре́хов оставле́ние дарова́ти, ве́рою и любо́вию чту́щим па́мять ва́шю. Конда́к, му́чеником, глас 8. Я́ко страда́льцем основа́ние, и благоче́стия столп, Це́ркви чте́т и сла́вит, твоя́ светоно́сная страда́ния, приснопа́мятне блаже́нне, страда́льче доблему́дрене сла́вне Трофи́ме. Со страда́вшими с Тобо́ю, очище́ние пою́щим вас испроси́те, я́ко непобеди́мии.
Открыть в MAX- Просмотры
- 158
- ER
- 7,6%
- Реакции
- 12