Пост канала
- видео
Бүгүн, балаҕан ыйын 19 күнүгэр, Чурапчы оройуонуттан 41 холкуос дьонун Аҕа дойду Улуу сэриитин сылларыгар күүс өттүнэн өрөспүүбүлүкэ хоту оройуоннарыгар көһөрүү 84 сылыгар аналлаах Кэриэстэбил уонна кутурҕан күнүгэр Чурапчытааҕы А.А. Саввин аатынан история уонна этнография музейыгар улууспут историятын бу ыар кэрчик кэмигэр анаммыт музей уруогар сырыттым. Уруокка Чурапчы нэһилиэгин оскуолаларын үөрэнээччилэрэ, Нам улууһун баһылыга Юрий Иннокентьевич Слепцов салалталаах делегация уонна уопсастыбаннас бэрэстэбиитэллэрэ, актыбыыстара кыттыыны ыллылар. Бу ыарахан кэмнэргэ дьон-сэргэ туһугар хорсуннук үлэлээн-хамсаан ааспыт норуоппут ньургун уола, биллиилээх судаарыстыбаннай диэйэтэлэ быйыл төрөөбүтэ 130 сылын туолбут Илья Егорович Винокуров улууспут колхуостарыттан Эдьигээн, Булуҥ, Кэбээйи оройуоннарыгар көһөрүллүбүт дьоммут дойдуларыгар эргиллэн кэлэллэрин туһугар оҥорбут сүдү үтүөтүн уонна алаастарыгар эргиллэн кэлбэтэх биир дойдулаахтарбытын кэриэстээн, ахтан-санаан кэпсэттибит. Аҕа дойду сэриитигэр Чурапчыттан 900 тахса киһи суох буолбутун таһынан, Хоту көһөрүү сыыһа дьаһалыттан сылтаан элбэх киһини сүтэрбиппит, оттон дойдутугар хаалан өлбүт-сүппүт, атын сиргэ көспүт дьоммут эмиэ бааллара. Сэрии иннинэ биһиги оройуоммутугар 19 279 киһи баар эбит буоллаҕына, сэрии бүтүүтэ баара-суоҕа 7 434 эрэ киһилээх хаалбыппыт. Сэрии кэнниттэн 46 сыл буолан баран 1988 сылга ахсааммытын ситиспиппит. 1943 сыллаахха Илья Егорович Винокуров Саха АССР Совнаркомун председателинэн ананыаҕыттан ходатайство түһэриллэн, Чурапчы дьонун төттөрү дойдуларыгар төнүннэрии дьыалата саҕаламмыта. Улууспут дьоно-сэргэтэ, ыччата дириҥник өйдүүллэр - Чурапчы көһөрүллүүтүн кыттыылаахтарын ааспыт ыар олохторо ханнык да тургутуулары, уустуктары уҥуордуур үтүө санааны, олоххо эрэли илдьэ сылдьыы үтүө холобура буоларын. Ааспыт тыйыс дьыллар тымныы тыыннара дойдубутугар, үүнэр ыччаппытыгар суоһаабатын! Чурапчы улууһун бу ыар сүтүгэ хаһан да умнуллубат, хас биирдиибит сүрэҕэр, өйүгэр-санаатыгар өрүү тыыннаах!
Открыть в MAX- Просмотры
- 154
- ER
- 1,3%
- Реакции
- 2