Пост канала
- фото
Бүгүн улуус баһылыгын бастакы солбуйааччыта Семен Бурнашев уонна улуустааҕы тутуу управлениетын специалиһа Лена Заболоцкая өрөмүөннэнэ турар үс сүрүн эбийиэги миэстэтигэр тиийэн көрдүлэр-иһиттилэр, подрядчиктары көрсөн үлэ хаамыытын билистилэр. Кэптэни бөһүөлэгэр оҕо уһуйаанын дьиэтэ акылаата хамсаан, муостата түһэн, оҕо сылдьарыгар кутталы үөскэппитэ. Бу кыһалҕаны туоратар сыалтан улуус дьаһалтата үп-харчы көрдөөн, өрөмүөн ыытыллар үбүн булан, уһуйаан иккис эбийиэгэр өрөмүөн ыытылла турар. Ол курдук муостатын көннөрүү үлэтэ ыытылла турар. Эбийиэк үрдүн баһаарынай ирдэбилгэ эппиэттиир гына оҥоруохтара, ол кэннэ уотун саҥалыы тардыахтара. Үлэни урбаанньыт Владимир Копырин тэрилтэтэ ыытар. Тутааччылар былаан быһыытынан алтынньы ый бүтүүтэ эбийиэк өрөмүөнүн түмүктээн, туттарыахтара. Салгыы Баатаҕай нэһилиэгэр «Дьиэ кэргэн» национальнай бырайыак чэрчитинэн култуура киинэ өрөмүөннэнэ турарын көрдүлэр-иһиттилэр. Үлэни «Вим» хааччахтаммыт эппиэтинэстээх тэрилтэ ыыта сылдьар. Былаан быһыытынан кулууп тымныы буолан сылааһы баттаһа таһын пенанан ыстарыахтаахтарын бүтэрбиттэр, маны таһынан муостата уларыйыахтаах, көрөөччү саалата саҥардыллыахтаах, иккис этээскэ библиотека бүтүннүү өрөмүөннэниэхтээх. Өрөмүөн кэмигэр муоста баалкыта эргэрэн, сорох өттө эмэҕирэн уларытыллар буолбута сүрүн кыһалҕаны үөскэппит. Бу кыһалҕаны туоратан, өрөмүөн үлэтин ыытан, ахсынньыга диэри үлэни түмүктүүргэ былаанныыллар. Дүпсүн нэһилиэгэр И.Н. Жирков аатынан оскуола интерната кыараҕас буолан, оҕолор олороллоругар усулуобуйа суоҕун учуоттаан, улуус дьаһалтата үөрэх управлениятын кытта үлэлэһэн, урукку «Кэскил» оҕо уһуйаанын дьиэтин ис бараанын уларытан, интернат оҥорорго быһаардылар. Бу үлэни урбаанньыт Юрий Бурнашев тэрилтэтэ ылынна, өрөмүөн үлэтин суһаллык ыытан, сэтинньи 1 күнүгэр диэри туттарарыгар сорук туруордулар. Улуус дьаһалтатын пресс-сулууспата.
Открыть в MAX- Просмотры
- 211
- ER
- 3,3%
- Реакции
- 7