Пост канала
- фото
Бүгүн II-с Байаҕантай нэһилиэгэр тыа хаһаайыстыбатын салаатыгар саҥа саҕахтары арыйар үөрүүлээх күн үүннэ. Тиит Арыы бөһүөлэгэр Тарабукиннар дьиэ кэргэн аныгылыы тупсаҕай көстүүлээх, 50 төбөҕө аналлаах саҥа хотонноро үөрүүлээх быһыыга-майгыга аһылынна. Анфиса уонна Константин Тарабукиннар сүөһү-сылгы иитиитинэн утумнаахтык дьарыктаммыттара номнуо 15 сыл буолла. Кинилэр төрүт дьарыгы сайыннарыыга, тыа сиригэр олоҕу-дьаһаҕы тупсарыыга ис сүрэхтэриттэн кыһаллаллар. Быйыл хаһаайыстыбаларын өссө киэҥник сайыннарар соруктаах, СӨ Тыатын хаһаайыстыбатын иһинэн үлэлиир «Кыра кыамталаах эбийиэктэри тутуу» анал бырагыраамматыгар кыттан, 50 төбөҕө аналлаах саҥа хотон тутуутугар грант ылан, ону олоххо киллэрэн, бэрт кичэйэн, хаачыстыбалаахтык туттулар. Хотону Мичил Готовцев салайааччылаах "Стимул" хааччахтаммыт эппиэтинэстээх тэрилтэ биригээдэтэ тутан үлэҕэ киллэрдэ. Быйыл саҥа хотоҥҥо 76 сүөһүнү, ол иһигэр 32 ыанар ынаҕы, 44 субай сүөһүнү кыстатар былааннаахтар. Үөрүүлээх күҥҥэ улуус баһылыга Василий Алексеев Өрөспүүбүлүкэ ыытар кыра кыамталаах эбийиэктэри тутуу бырагырааммата көдьүүстээҕин этэн туран, Тарабукиннар дьиэ кэргэн туттан киллэрбит хотонноро хаачыстыбалаахтык тутуллубутун бэлиэтээтэ, итиэннэ тыа сирин үлэһит дьонун өйөөһүн - улуус биир сүрүн соруга буоларын этэн туран, инникитин үлэлэригэр ситиһиилэри баҕарда, нэһилиэк баһылыга Адрей Егоров Тарабукиннар дьиэ кэргэттэрэ Россия Үлэҕэ Дьоруойа Михаил Готовцевы кытта сүөһү боруодатын турсарыыга ыкса үлэлэһэллэрин бэлиэтээтэ, итиэннэ хаһаайыстыбаларын кэҥэттэллэригэр нэһилиэк дьаһалтатын аатыттан оҕус бэлэх уунна, тыа хаһаайыстыбатын управлениетын начаалынньыгын солбуйааччы Матрена Федорова II-с Байаҕантай нэһилиэгэр өрөспүүбүлүкэ өйөбүлүнэн ааспыт сылга икки трактор, быйыл Николай Аргунов хаһаайыстыбатыгар 10 төбө сылгы бэриллибитин, итиэннэ бу саҥа хотон тутуллан үлэҕэ киирэн, улуус тыатын хаһаайыстыбатын сайдыытыгар кылааттарын киллэрэллэрин иһин махталын, эҕэрдэтин тиэртэ. Тарабукиннар дьиэ кэргэттэригэр чэгиэн доруобуйаны, үлэлэригэр үрдүк ситиһиилэри, төрөөбүт дойдулара сайдарын туһугар таһаарыылаах үлэни баҕарабыт! Улуус дьаһалтатын пресс-сулууспата.
Открыть в MAX- Просмотры
- 545
- ER
- 1,8%
- Реакции
- 10