Пост канала
- фото
Сэрии иннинэ Баҕарах-Тыама сиригэр, «Тыама» табаарыстыба 12 эдэркээн уолаттара саҥа сайыҥҥы титиик тутаары баҕана үүтүн хаһа сырыттахтарына уоттаах сэрии саҕаланан, бары сэриигэ аттаммыттара. Сайыҥҥы титиик тутуллубакка хаалбыта. Бу 12 киһиттэн 8 буойун кыргыһыы толоонугар сырдык тыына быстыбыта, 4 киһи төрөөбүт дойдутугар эргиллэн кэлбиттэр. Уолаттар сэриигэ барыахтарын иннинэ хаспыт баҕаналарын үүттэриттэн үгүс сыллар ааспыттарын кэннэ тииттэр үүнэн тахсан, күн бүгүн уолаттары санатан "Кэриэстэбил аллеята" буолан турар. Маҥнай бу үүммүт тииттэри Чараҥ оскуолатын учуутала Григорий Николаевич Бурцев көрбүт. Кини үйэтитэр санаатын өйөөн, биир дойдулааҕа эколог-общественник, Уус Алдан улууһун уонна I Хоро нэһилиэгин бочуоттаах олохтооҕо Иван Семенович Бурцевтын үйэтитэр үлэлэри саҕалаабыттара. Уолаттар ааттарын чуолкайдааһыҥҥа педагогическай үлэ бэтэрээнэ Марфа Афанасьевна Заровняева, кыраайы үөрэтээччи Николай Алексеевич Орлов, В.А. Протодьяконов - Кулантай аатынан литературнай түмэл үлэһитэ Клара Гаврильевна Бурцева үлэлэспиттэрэ. Кэриэстэбил аллеятын киэҥ эйгэҕэ сырдатыыга "Бороҕон ТВ" үлэһиттэрэ Екатерина Бочкарева, Евдокия Окоемова, Екатерина Аммосова үлэлээбиттэрэ. 2016 сыллаахха олохтоох дьаһалта аһаҕас халлаан анныгар турар түмэл выставочнай муннугун оҥорон, экспонаттары булан уурбуттара, олбуорун күрүөтүн саҥардыбыттара. 2017 сыллаахха Чараҥ оскуолата Баҕарах туһунан бырайыак көмүскээн, Саха Өрөспүүбүлүкэтин общественнай Сэбиэтигэр бигэргэнэн, ураты харыстанар сирдэрин тиһигэр, кэлин 2022 сыллаахха Россия Федерациятын ураты харыстанан сирдэрин тиһигэр киирбитэ. Бүгүн I Хоро нэһилиэгин эр дьонун түмсүүтэ, салайааччы Тимофей Крылов салалтатынан, сэриигэ барбыт биир дойдулаахтарын кэриэстээн, кинилэр ааттарын үйэтитэн, Баҕарахха «Тиит буолбут саха саллааттара» аһаҕас халлаан анныгар турар түмэлгэ, бэйэлэрин күүстэринэн, саха балаҕанын тутуутун саҕалаатылар. Улуус дьаһалтатын пресс-сулууспата.
Открыть в MAX- Просмотры
- 246
- ER
- 5,7%
- Реакции
- 14