Пост канала
- фото
📈 Ходоро нэһилиэгэр олохтоох көҕүлээһини өйүүр бырагырааманан үтүмэн үлэ ыытылынна ☀️🌿 Ханнык баҕарар киһиэхэ төрөөбүт дойдута, олорор түөлбэтэ туохтааҕар да күндү буолар, ол түөлбэҕин сайыннарар, тупсарар туһугар кыһаллыахтааххын. 🌳 Ходоро нэһилиэгэ уруккуттан туруу үлэһит дьоннорунан биллэр, мантан сатабыллаах салайааччылар, артыыстар, киинэ үлэһиттэрэ уо.д.а. кынат анньан тахсыбыттара. Турар сирэ да табыгастаах, киинтэн чугас, онон олорорго, үлэлииргэ үчүгэй. 2011 с. гаас ситимэ тардыллан үөрүүбүт үрдээбитэ. Ыаллар дьиэлэрин тупсарыыга үлэлэһэн, элбэх саҥа дьиэни дьэндэттилэр, эбии тутуннулар. 🏡 2018 сылтан олохтоох көҕүлээһини өйүүр бырагыраама киирэн, нэһилиэк тупсарыгар олук уурбута. Тоҕус сыл устата куонкуруска кыттан кэллибит. 2018 с. оҕо оонньуур былаһаакката тутуллубута. 2019 с. сайынҥы уу ситимин бастакы олуга, 2020 с. иккис олуга тардыллан нэһилиэк бары ыала уунан хааччыллыбыттара. 2021 с. ыһыахтыыр сирбит күрүөтэ өрөмүөннэнэн, саҥа тутуулар эбиллибитэ. 2022-2025 сылларга нэһилиэк иһинээҕи суоллар утумнаахтык тупсарыллан, оҥоһуллан нэһилиэнньэ абыранныбыт. Нэһилиэккэ киирии бэлиэлэр эргэрэннэр, быйыл суол икки өттүгэр киирии стела туруоруллан дьону үөртэ. Бу стелабыт дизайнын эдэр кийиит кыыспыт Сайыына Осипова толкуйдаан, сахалыы истииллээх, 5 харысхаллаах гына оҥоһулунна. Бу стеланы тутууга Новгородов Альберт Захарович тэрилтэтэ үлэлэстэ. Күнтэн барар батареялардаах, уоттаах-күөстээх буолла. 🤝 Олохтоох көҕүлээһин бырагыраама үс өттүттэн үбүлэнэр: өрөспүүбүлүкэттэн, нэһилиэк бүддьүөтүттэн, нэһилиэнньэттэн утары угуу уонна успуонсардар көмөлөрө. Ити барыта нэһилиэк баһылыга, дьаһалта, нэһилиэк олохтоохторо биир сүбэнэн үлэлиирбит түмүгэ буолар. 👐 Онон олохтоох көҕүлээһини өйүүр бырагыраама олоххо киирэн, нэһилиэкпит тупсар, сайдар, олорорго,үлэлииргэ усулуобуйа оҥоһуллар. Сайыны быһа турбанан уу быспакка кэлэн ыаллар элбэх оҕуруоту, араас сибэккини үүннэрэн олбуордарын тупсардылар, дохуот киллэрдилэр. Суолбут-ииспит оҥоһуллан иҥнибэккэ сылдьар буоллубут. Уулуссабыт барыта сырдатыллан сылдьарга табыгастаах. Улахан тыраасса аспаалланан быыл суох буолла. Үчүгэйэ, ыччаттарбыт дьиэ-уот туттан олохсуйаллара элбээтэ, атын да сиртэн элбэх ыал кэлэн олохсуйан иккис дойду оҥостон үлэлии-хамсыы сылдьаллар. Нэһилиэкпит тупсан аныгылыы көрүҥнэннэ. Сиһилии ⬅️ @gazetaerkeii @ulusmedia
Открыть в MAX- Просмотры
- 610
- ER
- 2,6%
- Реакции
- 16