Пост канала
🏗️ Тараҕай нэһилиэгэр быраас амбулаториятын саҥа дьиэтэ арылынна 🏥 Балаҕан ыйын 17 күнүгэр Тараҕай нэһилиэгэр доруобуйа харыстабылын тэрилтэтэ төрүттэммитэ 80 сылыгар саҥа быраас амбулаториятын дьиэтэ үлэҕэ киирэр үөрүүлээх күнэ тосхойдо. 🩺 Эбийиэк «Уһун уонна көхтөөх олох» национальнай бырайыак чэрчитинэн тутуллан олоххо киирдэ. Эбийиэги олохтоох «Мэҥэ-тутуу» ХЭТ хаачыстыбылаахтык тутан, болдьоҕор түмүктээтэ. 👏 Бэлиэ түгэҥҥэ СӨ Ил Дархана Айсен Николаев нэһилиэк олохтоохторун кытта быһа эпииринэн сибээскэ тахса сырытта. СӨ Бырабыыталыстыбатын бэрэссэдээтэлин солбуйааччы Георгий Степанов, улуус баһылыга Дмитрий Тихонов, СӨ Экэниэмикэҕэ миниистирэ, Мэҥэ Хаҥалас улууһун кураатара Петр Попов, Тараҕай нэһилиэгин баһылыга Юрий Порядин эҕэрдэлээн туран доруобуйа харыстабылын тиһигэр өр сыллаах үтүө суобастаах үлэлээх, нэһилиэнньэ доруобуйатын харыстабылыгар сүҥкэн кылааттаах дьоҥҥо, саҥа амбулатория эдэр эрчимнээх үлэһиттэригэр нэһилиэк, улуус, өрөспүүбүлүкэ наҕараадаларын туттардылар. 🔑 Саҥа дьиэ бэлиэ күлүүһүн Табаҕатааҕы быраас амбулаториятын сэбиэдиссэйэ Уруйдаана Сергучеваҕа «Мэҥэ-тутуу» ХЭТ кылаабынай инженерэ Кирилл Тастыгин туттарда. 🗣 Георгий Степанов, СӨ Бырабыыталыстыбатын бэрэссэдээтэлин солбуйааччы: – 2018 сылтан үлэлиир национальнай барыллар иилэринэн биһиги дойдубутугар, чуолаан Саха сиригэр, Мэҥэ Хаҥаласка социальнай эбийиэктэр тутуулара, үлэҕэ киириилэрэ тэтимин ыһыктабакка билигин даҕаны бара турар. Бүгүн Тараҕай нэһилиэгэр саҥа тупсаҕай оҥоһуулаах, аныгы ирдэбилгэ барытыгар толору эппиэттиир, хааччыллыбыт быраас амбулаторията үлэҕэ киирдэ. Бу улахан нэһилиэккэ төһүү күүс, дьон-сэргэ доруобай, эдэр ыччаппыт инникигэ эрэлллээх, аҕам саастаах дьоммут көхтөөх, уһун үйэлээх буоларыгар улахан кылаат буолар дии саныыбын. Аҥардас Мэҥэ Хаҥаласка быйыл бу иккис улахан эбийиэги үлэҕэ киллэрдибит. Сайын Маттаҕа өрөспүүбүлүкэтээҕи социальнай-геронтология киинэ арыллыбыта. Былырыын Аллараа Бэстээххэ учаастактааҕы балыыһа үлэҕэ киирэн билигин дьон-сэргэ доруобуйатын харыстабылыгар үлэлии турар. Уонна улууска саамай күүтүүлээх эбийиэкпит – киин балыыһа иккис уочаратын тутуута тэтимирэн, саҥа бэдэрээтчит кэлэн, 2027 сылга үлэҕэ киллэрэр былааннаахпыт. Ити курдук «Уһун уонна көхтөөх олох», «Дьиэ кэргэн», «Каадыр» национальнай барылларынан үлэ салҕанан бара турар. Сиһилии уонна элбэх хаартысканы БУ СИГЭНЭН киирэн билсиҥ ◀️ @gazetaerkeii @ulusmedia
Открыть в MAX- Просмотры
- 827
- ER
- 2,5%
- Реакции
- 21