Пост канала
- фото
🫶 «Маҥан халааттаах аанньалбыт – бэйэбит бырааспыт» диэн ааттыыллар 🩺 Талан ылбыт идэлэриттэн харыс да халбарыйбакка, сүрэхтиин умайан үлэлээбит уонна үлэлии сылдьар үтүөкэн үлэһит дьон баар буолаллар. Кинилэртэн биирдэстэрэ – төрөөбүт 2-с Наахаратын нэһилиэгэр 40 сыл устата сыламтата суох медсиэстэрэнэн үлэлээбит Екатерина Николаевна Кириллина. 🌿 Е.Н.Кириллина 1961 сыллаахха атырдьах ыйын 31 күнүгэр 2-с Наахара нэһилиэгэр Дария Яковлевна Ермолаева уонна Николай Петрович Кириллин дьиэ кэргэнигэр алтыс оҕонон күн сирин көрбүтэ. Оҕо сааһа Хочо бөһүөлэгин Халдьаайытыгар ааспыта. Халдьаайы – Хочо бөһүөлэгин кэрэ көстүүлээх түөлбэтэ. Сэбиэскэй кэмҥэ сыыр үрдүгэр биир уһун уулуссаҕа элбэх да ыаллар олорбуттара. Хас дьиэ аайыттан уолаттар-кыргыттар оскуолаҕа субуһаллара. Кинилэр ортолоругар сырдык хааннаах, чачархай баттахтаах сытыы-хотуу кыыс баара. Ол Катя Кириллина этэ. 🧧Оскуолатааҕы сылларыгар пионерскай, комсомольскай үлэ актыбыыһа, үөрэх бастыҥа, кини эрдэттэн медик буолар баҕалааҕа. Ол да иһин Алданнааҕы медучилищеҕа эксээмэннэрин ситиһиилээхтик туттаран киирбитэ. 💉 1982 сыллаахха үөрэҕин бүтэрэн үлэтин Уус-Маайа оройуонун Солнечнай бөһүөлэгэр хирургическай сиэстэрэнэн саҕалаабыта. Онно кылгас кэмҥэ үлэлээн баран дойдутугар Наахараҕа кэлбитэ уонна 40 сыл устата дьонун-сэргэтин эмтээн-томтоон, ыстаарсай сиэстэрэнэн биэнсийэҕэ тахсыбыта. Кини кэргэнинээн Петр Павлович Дьячковскайдыын биэс оҕолоох улахан ыал буолан, өр сылларга оҕо сааһа ааспыт Халдьаайы түөлбэтигэр олорбуттара. Халдьаайы олохтоохторо Катяларын маҥан халааттаах аанньалбыт, бэйэбит бырааспыт диэн ааттыыллар. 🎤 Екатерина Николаевна тустаах үлэтин таһынан уопсастыбанньык бэрдэ. Түөлбэ салайааччытынан, нэһилиэк сэбиэтин дьокутаатынан таһаарыылаахтык үлэлээбитэ. Сылын аайы ыытыллар култуура уонна успуорт эстэпиэтэтин биир көхтөөх кыттыылааҕа. «Кылыһах» чабырҕахсыттар ансаамбылларын чилиэнэ, сценкаһыт бэрдэ, кэрэ куоластаах ырыаһыт, култуура эстэпиэтэтин элбэх төгүллээх лауреата. 👨👩👧👦 Кини биэс оҕолоох истиҥ-иһирэх ийэ, сиэннэригэр тапталлаах эбээ. Икки кыыһа ийэлэрин туйаҕын хатаран медик идэтин таллылар. Сиһилии ⬅️ @gazetaerkeii @ulusmedia
Открыть в MAX- Просмотры
- 527
- ER
- 3,0%
- Реакции
- 16