Пост канала
- фото
🌊 Халаан уута от үлэтигэр содуллаах буолла 🌿 Ороссолуода нэһилиэгэр Александр Иванович Соловьев кэтэх хаһаайыстыбатыгар окко, былыргы өбүгэлэрбит үгэстэринэн, «абааһы мунньаҕын» кэнниттэн тута киирбиттэрэ. 🐄 Хаһаайыстыба хороҕор муостааҕа, сыспай сиэллээҕэ кыстыыр отун сыллата элбэх оҕолоох дьиэ кэргэн уонна халыҥ аймах күүһүнэн хаһааналлар. Дьоһуннаах үлэ түмүгүнэн Александр Иванович дьиэ кэргэнин, чугас аймахтарын идэһэ этинэн хааччыйар. 💭 Степан Соловьев, Александр Иванович быраата: 🌿 – Быйыл үлэбитин «Алаадьы» диэн ааттаах ходуһаттан, «Синтай» тыраахтарынан киирэн охсон саҕалаабыппыт. От үүнүүтэ олус үчүгэй этэ. Алаадьыттан ортотунан 1-2 кэбиһиилээх от, Бэрдьигэстээхтэн 4-5 от (1 кэбиһиилээх от 2-3 туонна буолар) кэлээччи. 🌨️ Соһуччу от ыйын 20 күнүгэр халаан уута кэлэн, охсубут оппутун бүтүннүү илдьэ барбыта. Үлэбит барыта тохтуурга күһэйиллибитэ. Уу барарын, сир-от куурарын кэтэһэ сырыттахха, санаабытыгар күһүн хойукка диэри оттуур балаһыанньа үөскүүр кутталламмыта. От охсорбутун, мунньарбытын, тыынан устан киирэн соһон таһаарбыппыт. Сэргэстэһэ баар оттуур сиртэн В.К.Антонов тыраахтарын, аҥаарынан ууга былдьанан турарын көрөн, собуоттаан, кураанах, үрдүк, уу тиийбэт сиригэр таһаарарга санаммыппыт. ГСМ чааһынан уустук кэмҥэ атыыласпыт сэлээркэбит, пластмаас иһиттээх буолан, ууну кытта устан тэҥҥэ барбыт этэ. 💪🏼 Таайым Александр Иванович бииргэ төрөөбүт 6 оҕоттон соҕотох уол буолар. Эдьиийдэрин, балтыларын оҕолорун, Дьокуускайтан, ыраах хоту дойдуттан сылдьар сиэннэрин окко-маска сыһыаран, көдьүүстээх үлэҕэ үөрэтэр. 📉 Быйылгы халаан уута элбэх мэһэйи оҥордо, хоромньуну таһаарда, элбэх сүөһүнү кыстатар ыарахаттардаах буолла. 🍀 Билигин уу барбыт, уолбут сирдэригэр кыралаан охсо сылдьабыт. Хайдах эрэ гынан сүөһүлэрбитин көҕүрэппэккэ кыстатар баҕа санаа баар. Сиһилии ⬅️ @gazetaerkeii @ulusmedia
Открыть в MAX- Просмотры
- 618
- ER
- 1,8%
- Реакции
- 11