Пост канала
- фото
Физкультурник күнүнэн! Сунтаар улууһун бары спортсменнарын, тириэньэрдэрин, физкултуура, успуорт хамсааһыннарын бэтэрээннэрин, физическэй култуура уонна успуорт эйгэтин үлэһиттэрин бу күнүнэн итиитик-истиҥник эҕэрдэлиибит! ССРС бырабыыталыстыбатын быһаарыытынан 1939 сыл от ыйын 18 күнэ Бүтүн Союзтааҕы физкультура үлэһиттэрин, спортсменнар күннэринэн биллэриллибитэ. Биһиги Сахабыт сиригэр бу күнү аан бастаан 1940 сыллаахха бэлиэтээбиттэр. Бырааһынньыгы Ленин болуоссатыттан параадынан ааспыттар, ол кэннэ Киров уулуссатыгар (оччолорго Красная молодежь), куорат стадионугар салҕаммыт. Гимнастар, акробаттар, ыарахан атлетиканан дьарыктанааччылар трюктары көрдөрбүттэр. Чэпчэки атлетикаҕа, волейболга, футболга күрэхтэһии буолбут. Сэрии кэнниттэн бу бырааһынньык суолтата өссө үрдээбит. Сыллааҕы түмүгү таһаараллар, сыл бастыҥ физкультурнигын, спортсменын быһаараллар, өйдөбүнньүк бэлэҕинэн, грамотанан наҕараадалыыллар, улахан күрэхтэһии тэриллэр. Идеология уларыйан, 1980-с сыллар бүтүүлэриттэн уонна 1990-с сылларга Физкультурник күнүн урукку курдук улахан далааһыннаахтык, үрдүк таһымнаахтык бэлиэтээбэт буолбуттара. Маассабай физкультура оннугар эргиэннээх, профессиональнай спорт инники күөҥҥэ тахсыбыта. Саха сиригэр Физкультурник күнүн урукку үрдүк таһымыгар түһэрэн, өрөспүүбүлүкэ таһымнаах маассабай бырааһынньык курдук сыаллаахтык бэлиэтээһин 2003 сылтан ыла күүскэ чөлүгэр түспүтэ. Бу сыл Саха сиригэр улахан уларыйыылар тахсыбыттара. “Чөл олох уонна доруобай дьиэ кэргэн сыллара” (2003-2006 сс.) Саха сирин иккис президена Вячеслав Штыров ыйааҕынан 2003 сылтан уһун кэмнээх доруобуйа хамсааһына саҕаламмыта. Арассыыйа президена Владимир Путин ГТО (Үлэҕэ уонна көмүскэлгэ бэлэм буол) комплексын саҥаттан тилиннэрэр туһунан ыйааҕы 2014 сыллаахха таһаарбыта. Бүгүн өрөспүүбүлүкэҕэ маассабай физическэй култуура көхтөөхтүк сайдан, чөл олоҕу таптааччылары бэйэтин кэккэтигэр тардар. Успуордунан ханнык баҕарар сааска уонна ханна баҕарар дьарыктаныахха сөбүн дакаастаан улуустарга физкультура күнүгэр эрэ буолбакка сылы эргиччи араас күрэхтэр, тэрээһиннэр буолаллар. Биһиги улууспутугар атырдьах ыйын 8 күнүгэр хас нэһилиэк ахсын Бүтүн Арассыыйатааҕы Физкультурник күнүгэр аналлаах тэрээһиннэр ыытыллыахтара. Сылын ахсын улууска олохторугар спорду өрө тутар дьон элбээн иһэллэрэ үөрдэр. Сунтаарга "Алмаас" стадиоҥҥа "Успуорт ыалы, көлүөнэлэри уонна норуоттары холбуур сүдү күүс!" тэрээһин кэмигэр ГТО бэлиэлэрин туттарыы, маастар кылаастар, күрэхтэр буолуохтара. Биир интэриэһинэй, дьон болҕомтотун тардар тэрээһининэн Сунтаар улууһун успуордун салаата тэрийэр Сунтаар улууһун 5 успуорт көрүҥэр муҥутуур көрдөрүүлэри (*Дартс* (набор очков) - ГЕОРГИЙ ДОКТОРОВ (560). *Скиппинг* (30сөк) - НИКОЛАЙ ИВАНОВ (108).*Кыраккыы* - АЛЕКСАНДР ПЕТРОВ (66). *Ох саа* - АЛЕНА НОВГОРОДОВА (67). *Корнхол* - ЕКАТЕРИНА ИВАНОВА (21)) куоһарарга холонор күрэх буолуоҕа. Тэрээһин сүрүн сыалынан ыччаты чөл олоххо тардыы, спорка тапталы иҥэрии буолар.
Открыть в MAX- Просмотры
- 228
- ER
- —
- Реакции
- —