Пост канала
- фото
Тыва дыл хүнүнге: төрээн дылың билир сен бе? Республиканың өөредилге албан черлеринде Тыва дылдың хүнүнге тураскааткан хемчеглер болуп эгелээн. Бо неделя дургузунда өөреникчилер класстар аайы-биле Тыва дыл олимпиадазынга киржирлер. Ол ышкаш уругларны «Шын бижи» деп диктантылар мөөрейи, «Тыва тоолдар маадырлары» деп чураан чуруктар мөөрейи болгаш оон-даа өске хемчеглер манап турар. Бо хүннерде Кызыл хоорайның 9 дугаар гимназиязында янзы-бүрү мөөрейлер, хемчеглер эртип турарын «Тываның аныяктары» солуннуң редакциязынга школада тыва дылдың метод каттыжыышкынының удуртукчузу Малина Солун-оол дыңнаткан. «Бистиң школавыста Тыва дылдың хүнүнге тураскааткан хемчеглер эгелей берген. Өөреникчилер база башкылар идепкейлиг киржип турарлар. Школаның хоочун башкызы Валентина Одурековна Домур-оол 7 класстарга «Төрээн дыл, төрээн чурт» деп билиглерге тыва дыл кичээлдеринде ужуражылганы эрттирген. Уруглар дыка сонуургап дыңнааннар. Сонуургаан айтырыглары хөй болган. Уруглар боттарының бодалдарын төрээн дылынга илередип, башкы-биле чугаалашканнар. Ол ышкаш школага чаңчыл езугаар неделя дургузунда Тыва дыл олимпиадазынга, тыва национал хептерин кедип алгаш, аянныг номчулга мөөрейинге киржирлер. Тиилекчилерни шаңнап-мактаар» - деп, ол чугаалаан. Мира КОНГУЛ-ООЛ. Башкының чуруу #тывадылхүнүнге
Открыть в MAX- Просмотры
- 642
- ER
- 1,7%
- Реакции
- 11