Пост канала
- фото
УЛУУС БАҺЫЛЫГЫН ПЛАНЕРКАТЫТТАН СОНУННАР Бүгүн, балаҕан ыйын 28 күнүгэр, улуус баһылыга Юрий Слепцов нэдиэлэтээҕи планерка мунньаҕы салайан ыытта. Мунньахха улуус дьаһалтатын, тэрилтэлэр салайааччылара уонна нэһилиэктэр баһылыктара кыттыыны ыллылар ✅Мунньахха оскуола үөрэнээччилэрин уонна оҕо уһуйааннарын иитиллээччилэрин итии аһылыгынан хааччыйыы боппуруоһа көрүлүннэ. Улуустааҕы үөрэҕирии управлениетын салайааччыта Мария Игнатьева уматык (бензин) кырыымчыгынан сибээстээн, нэһилиэк баһылыктарын олохтоох оскуолаларга уонна уһуйааннарга бородууктаны таһааһын боппуруоһугар көмөлөһөллөрүгэр, биир ситим буолан үлэлииллэригэр ыҥырда ✅Ону таһынан, оскуола үөрэнээччилэрин уонна оҕо уһуйааннарын иитиллээччилэрин олохтоох «Эрэл» ТХПК- ын эт уонна үүт бородууксуйатынан хааччыйыы боппуруоһун кэпсэттилэр. Улуус баһылыга нэһилиэктэр баһылыктарыгар тустаах тэрилтэлэргэ сылдьан оҕолор аһылыктарын хаачыстыбатын уонна тэриллиитин тус бэйэ хонтуруолугар ылалларыгар, оскуолалары уонна уһуйааннары кытта ыкса сибээстээхтик үлэлэһэллэригэр сорук туруорда. ✅Мунньахха нэһилиэктэргэ тыа хаһаайыстыбатын кооперативтарын тэрийии боппуруоһа көрүлүннэ. Улууска тыа хаһаайыстыбатын сайыннарыы стратегиятыгар олоҕуран, хас биирдии нэһилиэккэ тустаах кооперативтар үлэлиэхтээхтэр. Онон сибээстээн, бу хайысхаҕа үлэни күүһүрдэр сорук туруорулунна. ✅Быйыл улууска куонкурус түмүгүнэн алта хаһаайыстыба субсидия (көмө) ылан, дуогабарга олоҕуран, тыа хаһаайыстыбатын дьоҕус эбийиэктэрин тутан үлэҕэ киллэриэхтээхтэр. Билиҥҥи туругунан бу эбийиэктэргэ тутуу үлэлэрэ салҕанарын туһунан улуустааҕы тыа хаһаайыстыбатын управлениетын салайааччытын солбуйааччы Юрий Петров иһитиннэрдэ. ✅Балаҕан ыйын 25 күнүн туругунан улуус үрдүнэн оттооһун былаана 99,0 % туолбут, сорох хаһаайыстыбаларга от үлэтэ өссө да салҕанар диэн Юрий Петров иһитиннэрдэ. Сиилэһи угуу былаана — 91,2 % тэҥнэспит. ✅Хортуопуй уонна хаппыыста хомуура түмүктэнэн, былаан 100 % туолбут. Быйыл хортуопуй үүнүүтэ ортотунан гектартан 125 центнерга тэҥнэспит. ✅Улуус баһылыга Юрий Слепцов өрүс уҥуоргу нэһилиэктэргэ ас-үөл, эмп-том уонна бастакы наадалаах табаардар өрүс уутунан сырыы сабылла илигинэ тиэрдиллиэхтээхтэрин туһунан сорудахтаата. Бу хайысхаҕа олохтоох урбаанньыттары уонна тэрилтэлэри кытта таһааһын үлэтин сөпкө тэрийэр туһунан боппуруос мунньахха ураты болҕомтоҕо ылылынна. ✅Хас бирдии нэһилиэккэ ас-үөл өттүнэн хааччыллыы бигэ туругун (продовольственная безопасность) ситиһэр аналлаах былаан баар буолуута ситиһиллиэхтээҕин эттэ. ✅Кэлэр нэдиэлэҕэ, алтынньы 5 күнүгэр, Салбаҥ, Таастаах уонна Искра нэһилиэктэрин социальнай-экономическай сайдыыларыгар аналлаах форум ыытыллыаҕа. ✅Намнааҕы ветеринарнай сулууспа салайааччыта Павел Николаев ааспыт нэдиэлэҕэ СӨ тыа хаһаайыстыбатын министерствотын уонна ветеринария департаменын кытта видео-сибээс (ВКС) нөҥүө дьиэ кыылын, сүөһүтүн уонна сылгытын бэлиэтээһин (чипирование) боппуруоһугар мунньах буолан ааспытын туһунан иһитиннэрии оҥордо. Мунньахха Нам улууһа сылгыны чипированиелааһыҥҥа намыһах көрдөрүүлээҕэ бэлиэтэммитин эттэ. Ол курдук, билиҥҥи туругунан сылгыны бэлиэтээһин (чипирование) былаана 53 % тэҥнэһэр диэтэ. Павел Николаев бу хайысхаҕа үлэни тэрээһиннээхтик күүһүрдэн нэһилиэктэр баһылыктарын кытта ыкса сибээстээхтик, былааннаахтык үлэлээтэххэ ситиһиллэрин эттэ. ✅Улуус баһылыга нэһилиэктэр баһылыктарыгар уонна тэрилтэлэр салайааччыларыгар туһаайан, улуус тыа хаһаайыстыбатын бородууксуйатын оҥорон таһаарааччыларын өйүүр сыалтан, нэһилиэнньэ улууска оҥоһуллан тахсар аһы-үөлү уонна табаардары атыылаһарын ситиһэри, ону тэҥэ бу хайысхаҕа үлэни ыытары эттэ.⤵
Открыть в MAX- Просмотры
- 232
- ER
- 1,3%
- Реакции
- 3