Пост канала
- фото
ОТТООҺУН БОППУРУОҺУГАР СӨ БЫРАБЫЫТЫЛЫСТАБАТЫН ТАҺЫМЫГАР ВКС НӨҤҮӨ МУННЬАХ БУОЛЛА Бүгүн, атырдьах ыйын 14 күнүгэр, Саха Өрөспүүбүлүкэтин Бырабыытылыстыбатын Бэрэссэдээтэлин солбуйааччы Сергей Местников кыстыкка сүөһү аһын бэлэмнээһин уонна оттооһун боппуруостарыгар видео-конференц сибээс (ВКС) нөҥүө мунньаҕы салайан ыытта. Мунньахха улуус баһылыга Юрий Слепцов уонна улуустааҕы тыа хаһаайыстыбатын управлениетын начальнигын солбуйааччы Юрий Петров кыттыыны ыллылар. Мунньахха иһитиннэриллибитинэн, СӨ Тыа хаһаайыстыбатын уонна аска-үөлгэ политикатын министиэристибэтэ атырдьах ыйын 20 күнүгэр диэри субсидия көрүллүүтүн бэрээдэгинэн, оттуур мобильнай биригээдэлэр ороскуоттарын уйунарга анал сайаапкалары хомуйар. Бүгүҥҥү күн туругунан, ардах уутуттан оттуур сирдэрэ ууга барбыт (эмсэҕэлээбит) улуустарга мобильнай биригээдэлэри тэрийиигэ, от атыылаһыытыгар уонна тиэйиитигэр өрөспүүбүлүкэ бюджетыттан уопсайа 39 мөл. солкуобай харчы көрүллүбүт. Улуустааҕы тыа хаһаайыстыбатын управлениета министиэристибэҕэ сайаапкалары түһэрэн олорор. Ону тэҥэ, сайыҥҥы кэмҥэ ардах уонна халаан уутугар барбыт ходуһалартан оттонуллубут от хаачыстыбатын СӨ Ветеринарияҕа департаментын лабораториялара анализ ылан оҥороро ирдэнэрин эттилэр. Юрий Иннокентьевич бу боппуруоска бэйэтин санаатын этэн, этиилэри киллэрдэ. Ол курдук, сайыҥҥы уу кэлиититтэн от үлэтигэр ыарахаттары көрсүбүт тыа сирин үлэһиттэрин балаһыанньаларын учуоттаан, от хаачыстыбатын лабораторнай чинчийиитин төлөбүрүн аҕыйатар (чэпчэтэр) сыаллаах, анализтары сүрүн эрэ көрүҥнэринэн ыытарга уонна усулуобуйаны чэпчэтэргэ этии киллэрдэ. Бу этиини министиэристибэ дьүүлгэ ылан, салгыы үөрэтэргэ уонна көрүүгэ ылла. Мунньах түмүгүнэн СӨ Бырабыытылыстыбатын Бэрэссэдээтэлин солбуйааччы Сергей Местников улуустарга оттооһун былаанын 100% толорорго сыалы-соругу туруорда. Мунньахха СӨ тыа хаһаайыстыбатын миниистирин э.т. Анна Стручкова, өрөспүүбүлүкэ улуустарын, куораттарын баһылыктара, тустаах департаменнар уонна ведомстволар салайааччылара кыттыыны ыллылар. «Нам улууһа» МО пресс-сулууспата
Открыть в MAX- Просмотры
- 252
- ER
- 1,2%
- Реакции
- 3