Пост канала
- фото
2026 сыл алтынньы ый 9 күнүгэр Сунтаар улууһун Түбэй нэһилиэгэр “Сааһым миэнэ – мин баайым” диэн аҕам саастаахтар декадаларын чэрчитинэн нэһилиэкпитигэр убаастанар ытык ыалбыт Васильевтар, үлэ, спорт бэтэрээнэ, 1988 сылга социалистическай күрэх түмүгүнэн бастыҥ сылгыһыт үрдүк аатын ылан 4-с республиканскай слёт кыттыылааҕа, көҥүл тустуу спордун маастарыгар кандидат, көҥүл тустуу, хапсаҕай республиканскай уонна оройуоннааҕы күрэхтэһиилэр хас да төгүллээх чемпионнара Виктор Степанович уонна кини олоҕун аргыһа үлэ, потребкооперация ветерана, сэбиэскэй потребкооперация туйгуна Светлана Дмитриевна аал уоту оттунан, алаһа дьиэни тэринэн ыал диэн үрдүк ааты сүгэн эйэлээхтик-иллээхтик 50 сыл бииргэ олорбуттарын чиэстээһин буолан ааста. 50 сыл аҥараа өттүгэр 1976 сыл атырдьах ыйын 28 күнүгэр эдэркээн уоллаах кыыс Сиэйэ сэбиэтигэр кэлэн кэргэннии буолууну регистрациялыыр докумуоҥҥа илии баттаан ыал буолбуттар. Ыал буолбут ытык бэлиэлэрин, уоллаах кыыс оҕону төрөтөн иитэн, 5 сиэҥҥэ эйэҕэс эбээ, эһээ дэтэн, нэһилиэккэ ытыктанар дьоһун олохтоох ыал буолаллар. Үбүлүөйдээхтэри нэһилиэк баһылыга Яна Валериевна Зедгенидзева эҕэрдэлээтэ, Саха Өрөспүүбүлүкэтин Ил Дархан уурааҕынан олохтоммут «Дьиэ кэргэн килбиэнэ» бочуоттаах бэлиэни үөрүүлээх быһыыга-майгыга туттарда. Ытыктыыр дьоммутун олохтоох дьаһалта специалиһа Анастасия Степанова Сунтаар улууһун дьиэ кэргэттэрин Кыһыл көмүс кинигэтигэр киллэрдэ. Бу күн нэһилиэк кырдьаҕастарын уонна Чэмэлиинэ дьахталлар сүбэлэрин ааттарыттан салайааччы Дария Румянцева, Түбэй орто оскуолатын коллективын иһинэн тэриллибит Сиккиэр ырыа ансаамбыла ис дууһаттан эҕэрдэ бастыҥын анаатылар, ылбаҕай ырыа ыллаатылар. Анастасия Степанова, Түбэй нэһилиэгин дьаһалтатын ГТАС боппуруостарыгар специалиһа
Открыть в MAX- Просмотры
- 167
- ER
- 4,8%
- Реакции
- 8