Пост канала
- фото
✍Тываның Чазаанга чоннуң байырлалынга тураскаадып, мал ажыл-агыйының мурнакчыларынга болгаш Наадым чемпионнарынга күрүне шаңналдарын тыпсыр хемчег үезинде ТР-ниң Көдээ ажыл-агый болгаш аъш-чем яамызының хой болгаш өшкү ажыл-агыйын хөгжүдеринге адырны деткиир талазы-биле ажылдап кылганы «Хойжу» төлевилелин сайгарып чугаалашкан. Тываның Баштыңы Владислав Ховалыг Көдээ ажыл-агый яамызының эгелээни төлевилелинге хамаарыштыр боттарының санал-оналын үлежиринче малчыннарны чалаан. Төлевилел хой болгаш өшкү азырап-өстүрүп чоруур малчыннарга күрүнениң талазындан деткимче хемчеглерин калбартыр болгаш адырның экономиктиг үре-түңнелин бедидер сорулганы салып турар. Беш чылдың дургузунда мөөрейлиг шилилге-биле 18 киржикчини чыл санында тодарадып, оларга малдың баш санын өстүрүп-көвүдээринге деткимчени бээр. Ол ышкаш төлевилел шээр мал өстүрүп турар малчыннарга социал деткимче хемчеглерин база көрген, чижээ, санаторлуг-курорт эмнээшкини, дузалакчы малчыннарны ажылга хүлээри, көдээ ишчилерниң ажы-төлүн школа-интернаттарга тургузары дээш, оон-даа өске. Наадым «чемпиону» база «мурнакчызы» эрге-байдалды алган, беш чылдан хөй күш-ажыл стажтыг, арга-дуржулгалыг болгаш үре-түңнелдиг хойжуларны төлевилелче баштай шилиир. Төлевилелдиң таныштырылгазы хемчегниң киржикчилериниң улуг сонуургалын оттурган. Көдээ ажыл-агыйының хоочуну, «Уургай» көдээ ажыл-агый бүдүрүлге кооперативиниң даргазы Батаа Кунгаа, Наадым 2026-ның чемпиону, Кызыл кожуундан тараачын-арат ажыл-агыйының баштыңы Адыгжы Чаш-оол, Кызыл кожуунда «Феникс» көдээ ажыл-агый бүдүрүлгезиниң удуртукчузу Ольга Ширин, Каа-Хем кожууннуң Бүрен-Аксы суурда тараачын-арат ажыл-агыйының аныяк удуртукчузу Ролан Ховалыг болгаш өскелер-даа үзел-бодалын үлешкеннер. Сөс алганнар эгелекчи төлевилелдиң ажыктыын болгаш чогуур үезинде эгелеп турарын демдеглеп, аңаа киржир негелделерге хамаарыштыр саналдарны кииргеннер. Владислав Ховалыг сайгарылга үезинде кирген санал-оналдарны барымдаалап, төлевилелди чедир ажылдап кылырын Көдээ ажыл-агый яамызынга дааскан. Ол ышкаш кожуун чагырга удуртукчуларының киржилгези-биле төлевилелди аңгы сайгарып көөрү чугула дээрзин айыткан. «Малчыннар-биле мал бажының санын көвүдедери, грантыларны үлээри, көдээ ажыл-ишче аныяктарны хаара тудары дээн ышкаш, чугула айтырыгларны кады сайгарып чугаалаштывыс. Чогумчалыг шиитпирни тывары-биле көдүрдүнген шупту темаларга доктаамал ажылдаар бис» – деп, Тываның Баштыңы ужуражылга соонда бижээн.
Открыть в MAX- Просмотры
- 558
- ER
- 0,7%
- Реакции
- 4